~*~Carry Forward~*~
phir saal ki akhri sham hui
phir waqt ki dor mein girha lagi
lo waqt hua phir gin-ne ka
gaye saal ki khushyon k lamhey
aur gayee ruton k sab aansoo
aur waqt ki kaali aandhi mein
hamen raah dikhatey sab jugnu
aur bhooley kaun sitaron ko
un naye puraney yaaron ko
jo her mushkil mein saath rahey
jo sab rahon per sath chaley
Aur iss ginti mein shamil hein
jo jaag k kaatin raaten sab
jo sajni se kin baaten sab
jo maan ney sunaayee woh lori
aur saari duaen behna ki
aur apney des se doori bhi
jo hijr bani, majboori bhi
ger tumko lagey k yeh sab kuchh
gaye saal k saath na reh jaye
to yeh sab kuchh
tum gin-na apni ungliyon pe
phir muthi ko bund ker lena
aur pehli subha naye saal ki ho
to khol k apni muthi ko
in sab ko bhi sath hi le chalna
Tags: new year, Poetry
~*~Pardesi Eid~*~
Yeh apney des ki Eid nahin
yeh begani si lagti hai
aankhon mein andherey hein dil mein
kuchh veerani si lagti hai
na maan ne uthaya aaj subha
na bhai sey larey nahaney per
na behna ne eidi maangi hai
masjid se wapas aaney per
na galey mila koi hamsaya
na phone pe baaten yaaron se
na gosht bana aur na baanta
na miley hein rishtey daron se
jo sajni hum se sajti thi
usey sajney ka ehsaas nahin
hai jaan hamari door buhut
aur jaan ki jaan bhi paas nahin
din eid ka hoga khushyon ka
par unka jo apnon ke sath rahen
hum pardesi kya eid karen
jahan aik se din aur raat rahen
majboor, akeley Eid ke din
haye aag lage majboori ko
jo Eid ke maani badal gayee
Rub door karey iss doori ko
Tags: Eid, Poetry
A piece of poetry after a very long time.
~*~bey rabt~*~
agar ho faaasla zyada
agar mushkil ho laut aana
agar na rabt ho koi
ya ho bhi to
faqat awaz ki had tak
ya kuchh be jaan tasveeren
to phir kab pyaas bujhti hai
suna tha hum ne sab se
aaj khud mehsoos kerte hein
kissi se door jaaney per
muhabbat aur berhti hai
Tags: Poetry, urdu
